बॅडमिंटन वर्ल्ड चॅम्पियनशिपमध्ये भारताचं पदक निश्चित; सात्विक- चिराग जोडीने इतिहास रचला
क्रीडा

बॅडमिंटन वर्ल्ड चॅम्पियनशिपमध्ये भारताचं पदक निश्चित; सात्विक- चिराग जोडीने इतिहास रचला

टोकियो- सध्या सुरू असलेल्या बॅडमिंटन वर्ल्ड चॅम्पियनशिपमध्ये भारताच्या पुरुष दुहेरी जोडीने आपली उत्कृष्ट खेळी दाखवत विजयी पताका रोवली. सात्विकसाईराज रँकिरेड्डी आणि चिराग शेट्टी या स्टार भारतीय पुरुष दुहेरी जोडीने शुक्रवारी उपांत्यपूर्व फेरीत जागतिक बॅडमिंटन स्पर्धेत जागतिक क्रमवारीत दुसऱ्या क्रमांकाच्या जपानी जोडी ताकुरो होकी आणि युगो कोबायाशी यांचा पराभव करून आपले पहिले पदक निश्चित केले. बॅडमिंटन वर्ल्ड चॅम्पियनशिपमध्ये उपांत्य फेरीत धडक मारून देशासाठी पदक निश्चित करणारी ही पहिली भारतीय पुरुष दुहेरी जोडी ठरलीय.
या महिन्याच्या सुरुवातीला राष्ट्रकुल क्रीडा स्पर्धेत सुवर्णपदक जिंकणाऱ्या जागतिक क्रमवारीत ७व्या क्रमांकाच्या भारतीय जोडीने चमकदार कामगिरी करत विजेतेपदाच्या दावेदार आणि गतविजेत्या जपानी जोडीला २४-२२, १५-२१, २१-१४ अशा गुण फरकांनी पराभूत केले. उपांत्य फेरीत दाखल होत प्रथमच जागतिक चॅम्पियनशिपमध्ये स्वतःसाठी देखील त्यांनी पदक निश्चिती केली आहे.
जागतिक बॅडमिंटन चॅम्पियनशिपमधील दुहेरीत भारताचे हे दुसरे पदक आहे. यापूर्वी ज्वाला गुट्टा आणि अश्विनी पोनप्पा या जोडीने २०११ मध्ये महिला दुहेरीत पदक जिंकले होते.

तत्पूर्वी, एमआर अर्जुन आणि ध्रुव कपिला यांची विजयी मोहीम मोहम्मद अहसान आणि हेंद्रा सेटियावान या तीन वेळा सुवर्णपदक विजेत्या जोडीकडून पुरुष दुहेरीच्या उपांत्यपूर्व फेरीत पराभूत झाल्याने संपुष्टात आली.

बिगरमानांकित भारतीय जोडीला तिसऱ्या मानांकित इंडोनेशियन जोडीकडून ३० मिनिटांत ८-२१, १४-२१ असा पराभव पत्करावा लागला.

या भारतीय जोडीने याआधी आठव्या मानांकित डेन्मार्कच्या किम एस्ट्रुप आणि अँडर्स स्कार्प रासमुसेन यांचा दुसऱ्या फेरीत पराभव केला होता.