वर्षाअखेरचे पर्यटन तासांच्या अंतरावरच; करोना, ओमायक्रॉनच्या भीतीने जवळच्या सहली
पर्यटन

वर्षाअखेरचे पर्यटन तासांच्या अंतरावरच; करोना, ओमायक्रॉनच्या भीतीने जवळच्या सहली

ओमायक्रॉनची भीती, तिसऱ्या लाटेची चिंता आणि २०२०मध्ये अनुभवलेले घरकोंडलेपण यामुळे वर्षाखेरच्या निमित्ताने जवळच्या ठिकाणी पर्यटनाचा आनंद अनुभवण्यासाठी उत्साह दिसत आहे. अनेक मुंबईकर फार लांबच्या सहलींचे आयोजन न करता अलिबाग, नागाव, रत्नागिरी, दापोली, लोणावळा, महाबळेश्वर, इगतपुरी अशा ठिकाणांना भेट देऊन कुटुंबीय, मित्रमैत्रिणींसोबत वेळ घालवण्यासाठी प्रयत्नशील आहेत.

यंदा दसरा-दिवाळीपासून पर्यटनाला हळुहळू चालना मिळायला लागली. अनेक राज्यांनी आता आरटी-पीसीआर चाचणीचे निर्बंध शिथिल केले आहेत. लसीकरणाचे दोन्ही डोस पूर्ण झाले असतील तर आरटी-पीसीआरची अट नाही. त्यामुळे राज्यांतर्गत पर्यटनाला चालना मिळाली. मात्र सध्या तिसऱ्या लाटेची चर्चा लक्षात घेता लवकर घर गाठता यावे, वैद्यकीय उपचार मिळावेत, असा विचार करून जवळच पर्यटनाचा पर्याय मुंबईकरांनी स्वीकारला आहे.

जून-जुलैपासून काश्मीरने पर्यटन खुले केल्यानंतर काश्मीर, लेह, लडाख इथेही नोंदणी चांगली व्हायला सुरुवात झाली. हे पर्यटन करताना पर्यटकांना आणि आयोजकांनाही पुन्हा आत्मविश्वास मिळाल्याचे महाराष्ट्र टूर ऑर्गनायझर्स असोसिएशनचे सरचिटणीस चेतन दुनाखे यांनी सांगितले. अजूनही मोठ्या सहलींना लोकांचा प्रतिसाद नसला तरी घरच्यांचे, नातेवाईकांचे समूह करून वैयक्तिक सहलीचे आयोजन करण्यात येत आहे. आता अनेक पर्यटकांचे दोन्ही डोस पूर्ण झाल्याने हे सहल आयोजन पुन्हा एकदा वाढल्याचे चित्र दिसत असल्याचे ते म्हणाले.

मुंबईपासून जवळच्या परिसरात २४ डिसेंबरपासून २ जानेवारीपर्यंत हॉटेल, गेस्टहाऊस, होम स्टे, महाराष्ट्र पर्यटन महामंडळाची निवासी व्यवस्था पूर्णपणे भरलेली असल्याचे दिसून येत आहे. लॉकडाउनच्या काळामध्ये राज्यातील पर्यटनाला लोकांनी प्राधान्य दिले. पूर्वी वीकेण्ड किंवा इयर एण्डला तीन दिवस सुट्टी असेल तर विमानप्रवास करून उटी, दार्जिलिंग अशा सहलींचे आयोजन व्हायचे. सध्या हा परिपाठ बदलला आहे.

सुट्टी आणि कामही

आत्तापर्यंत कोकणामध्ये ठराविक किनाऱ्यांवर पर्यटनाला चालना मिळत होती. आता पर्यटक न पोहोचलेले किनारे, ठिकाणेही प्रकाशात येत आहेत. त्यासोबत वर्केशन्स या संकल्पनेच्या निमित्तानेही एक-दोन आठवडे पर्यटनस्थळी बंगला किंवा घर भाड्याने घेऊन काम आणि सुट्टी असा दोन्हीचा आनंद घेतला जात आहे. वर्षाची अखेरही अशाच पद्धतीने साजरी करण्याचेही प्रमाण यंदा वाढलेले दिसते.