MTDC चे रिसॉर्ट खासगी उद्योजकांच्या घशात घालण्याचा घाट, भाडेतत्त्वार देण्यात येणार
पर्यटन

MTDC चे रिसॉर्ट खासगी उद्योजकांच्या घशात घालण्याचा घाट, भाडेतत्त्वार देण्यात येणार

म. टा. प्रतिनिधी, पुणे : पर्यटकांसाठी दर्जेदार सुविधा देता येत नसल्याची सबब देऊन राज्य सरकारने महाराष्ट्र पर्यटन विकास महामंडळाच्या (एमटीडीसी) महाबळेश्वर, माथेरानसह अन्य पाच ठिकाणी असलेली मोक्याच्या जागेवरील रिसॉर्ट खासगी उद्योजकांच्या घशात घालण्याचा घाट घातला आहे. खासगी उद्योजकांना जागा भाडेतत्त्वावर देण्याच्या करारावर पर्यटनमंत्री आदित्य ठाकरे यांनी नुकत्याच सह्या केल्या आहेत. येत्या काळात पर्यटकांना या ठिकाणी अधिक शुल्क मोजण्याची तयारी आता ठेवावी लागण्याची शक्यता आहे.

महाराष्ट्र पर्यटन विकास महामंडळाने पर्यटकांची विश्वासार्हता कमावल्यामुळे सर्व रिसॉर्टवर वर्षभर पर्यटकांची वर्दळ असते. सुट्टीच्या हंगामात महिनाभर आधी बहुतांश रिसॉर्टचे बुकिंग पूर्ण होते. मोक्याच्या ठिकाणी प्रशस्त जागेत बांधलेल्या या रिसॉर्टची लोकप्रियता वाढत असताना राज्य सरकारने वर्षभरापूर्वी रिसॉर्टच्या खासगीकरणाचा निर्णय जाहीर केला होता. या संदर्भात काही महिन्यांपूर्वी महाबळेश्वर, माथेरान, मिठाबाव, हरिहरेश्वर आणि ताडोबा या रिसॉर्टसाठी निविदाही मागितल्या होत्या. निवड प्रक्रिया पूर्ण झाल्यामुळे ठाकरे यांनी विशेष कार्यक्रम घेऊन खासगी विकसकांबरोबर नवीन केलेले करारपत्र जाहीर केले. या वेळी पर्यटन राज्यमंत्री आदिती तटकरे, प्रधान सचिव वल्सा नायर सिंह; तसेच इतर पदाधिकारी उपस्थित होते.

राज्यातील बहुतांश पर्यटन स्थळांवर सरकारी जमिनी ‘एमटीडीसी’च्या ताब्यात आहेत. नव्या करारानुसार निवड झालेल्या पाचही ठिकाणी खासगी विकसकांना उपलब्ध खोल्यांमध्ये बदल, वास्तूरचनेतीबल बदलांचे अधिकार दिले आहेत. यात हेरिटेज वास्तू अपवाद ठेवल्या आहेत. नवीन करार तीस वर्षांचा आहे. हा प्रकल्प सरकार आणि खासगी विकसक यांचा संयुक्त उपक्रम असल्याचा दावा सरकारने केला आहे. महाराष्ट्र पर्यटन विकास महामंडळाकडे पुरेसे मनुष्यबळ आणि व्यवस्थापन यंत्रणा असतानाही सरकारने खासगीकरणाचा घाट घातल्यामुळे स्थानिक कर्मचाऱ्यांनी नाराजी व्यक्त केली आहे.

बांधकामासही विकसकांना परवानगी

महामंडळाची महाबळेश्वर, माथेरान, हरिहरेश्वर, सिंधूदुर्गमधील मिठबाव आणि चंद्रपूरमधील ताडोबा रिसॉर्ट लोकप्रिय आहेत. येथील रिसॉर्ट खासगी कंपन्यांकडे करारानुसार चालविण्यास दिले आहे. करारामध्ये कंपन्यांना रिसॉर्टच्या नूतनीकरणाबरोबरच रिकाम्या जागेमध्ये चटईक्षेत्र निर्देशांकानुसार नवीन बांधकामासही परवानगी दिली आहे; याशिवाय यवतमाळ येथील टिपेश्वर आणि नगरमधील भंडारदरा येथील रिसॉर्टही भाडेतत्त्वावर देण्यासाठी महामंडळाने निविदा प्रसिद्ध केल्या आहेत. यासाठी दोन जून अंतिम तारीख आहे. या दोन रिसॉर्टची प्रक्रिया पूर्ण झाल्यावर आणखी काही रिसॉर्ट प्रतीक्षेत आहेत.

पर्यटकांना उच्च दर्जाची सेवा मिळावी, त्यांच्यासाठी आधुनिक सोयीसुविधा उपलब्ध करण्याच्या उद्देशाने राज्य सरकारने हा निर्णय घेतला आहे. यामुळे राज्यातील पर्यटनाला निश्चित चालना मिळेल. रिसॉर्टचे करार झाले असले, तरी महाराष्ट्र मंडळाच्या संकेतस्थळांवरून त्यांचे बुकिंग करता येईल.

 

सरकारने चालवावीत रिसॉर्ट

राज्यातील पर्यटनाला चालना मिळावी, पर्यटकांसाठी आवश्यक सुविधा निर्माण व्हाव्यात, यासाठी पर्यटनमंत्री आदित्य ठाकरे कायम पुढाकार घेताना दिसतात. मात्र, पर्यटन विकास महामंडळाकडील अत्यंत मोक्याच्या ठिकाणी असलेल्या रिसॉर्टच्या जागा खासगी उद्योजकांच्या घशात घालण्याचा प्रकार तेथे काम करणाऱ्या अनेक अधिकारी-कर्मचाऱ्यांना पटलेला नाही. ‘एमटीडीसी’ची सर्व रिसॉर्ट ‘प्राइम’ लोकेशनला असूनही त्यासाठी वाजवी शुल्क आकारले जात असल्याने पर्यटकांची पहिली पसंती त्याला मिळायची. आता यातील महत्त्वाची रिसॉर्ट खासगी उद्योजकांच्या ताब्यात गेल्यावर येथे राहणे सर्वसामान्यांसाठी दुरापास्त होणार आहे. तसेच, या ठिकाणी बांधकाम करण्यास, अस्तित्वातील इमारती पाडण्याची मुभा सरकारने दिल्याने काही ठरावीक मंडळींसाठी हा घाट घालण्यात आला आहे का, अशी शंका उपस्थित होत आहे. त्यामुळे सरकारने पूर्वीप्रमाणे ही सर्व रिसॉर्ट स्वतः चालविणे गरजेचे आहे.