वीकेंड पर्यटनाला बंदी असताना भटकंती पडली महागात; आठशे जणांवर कारवाई
पर्यटन

वीकेंड पर्यटनाला बंदी असताना भटकंती पडली महागात; आठशे जणांवर कारवाई

वीकेंड पर्यटनाला बंदी असताना भटकंतीला बाहेर पडलेल्या आठशे पर्यटकांवर शनिवारी आणि रविवारी ग्रामीण पोलिसांनी कारवाई केली. त्यांच्याकडून दोन दिवसांत तब्बल तीन लाख ८७ हजार रुपये दंड आकारण्यात आला. खडकवासला, सिंहगड, लोणावळा, मुळशी, ताम्हिणी भागात फिरायला गेलेल्या पर्यटकांवर ही कारवाई करण्यात आली.

शुक्रवारी झालेल्या आढावा बैठकीतही त्यांनी पर्यटन बंदीचा पुनरुच्चार केला होता. पोलिसांना पर्यटकांवर कारवाईच्या सूचना दिल्या होत्या; तरी शनिवारी सकाळपासून पर्यटक भटकंतीसाठी बाहेर पडले. रविवारीदेखील दुपारनंतर पर्यटकांची गर्दी वाढत गेली. त्यामुळे शहराच्या बाहेर लोकप्रिय पर्यटनस्थळी जाणाऱ्या सर्व मार्गांवर जिल्हा पोलिसांनी सकाळपासूनच नाकाबंदी केली. पर्यटनासाठी आलेल्या, मास्क न लावलेल्या, पोलिसांशी हुज्जत घालणाऱ्या, गाडीत सुरक्षित अंतराचा नियम न पाळणाऱ्या पर्यटकांवर कारवाई करण्यात आली.

लोणावळ्यातील लोकप्रिय ठिकाणांकडे जाणाऱ्या कुमार चौकी, कार्ला, मळवली, पवना नगर, लायन्स पॉइंट येथे पोलिसांनी नाकाबंदी केली होती. दोन दिवसांत लोणावळा शहर पोलिसांनी १२६ पर्यटकांवर कारवाई करून ५० हजार रुपये दंड वसूल केला. ग्रामीण पोलिसांनी ३९८ जणांवर कारवाई केली, यातून दोन लाख १० हजार रुपयांचा दंड जमा झाला. मुळशी, ताम्हिणी भागातील धबधब्यांकडे, डोंगर दऱ्यांमध्ये फिरण्यासाठी आलेल्या पर्यटकांवर पौड पोलिसांनी अडवले. दोन दिवसांत ८८ पर्यटकांवर नियमबाह्य वर्तनामुळे ४५ हजार रुपये दंड घेण्यात आला.

सिंहगड, खडकवासला भागात फिरायला गेलेल्या नागरिकांवर हवेली पोलिसांनी कारवाई केली. शनिवारी ७८ पर्यटकांवर कारवाई करून ३६ हजार रुपये; तसेच रविवारी १०२ पर्यटकांवर कारवाई करून ४६ हजार ६०० हजार रुपये दंड वसूल करण्यात आला. वीकेंड पर्यटनावर बंदी जाहीर करून तीन आठवडे झाले तरीही पर्यटक सुट्टीच्या दिवशी वेगवेगळी कारणे काढून भटकंतीला बाहेर पडत आहेत. गर्दी कमी करण्यासाठी सुट्टीच्या दिवशी सकाळपासूनच कारवाई करण्याचा पर्याय पोलिसांनी निवडला आहे.

वीकेंड पर्यटन बंदीमुळे जाहीर झाल्यापासून आम्ही पर्यटकांवर कारवाई करत आहोत. आत्तापर्यंत साडे तीन लाख रुपयांहून अधिक दंड जमा झाला आहे. या वीकेंडला पर्यटकांनी सर्वाधिक गर्दी केली होती. खडकवासला आणि गोळेवाडी दोन्ही ठिकाणी आम्ही पर्यटकांची चौकशी केली. दुपारी गर्दी वाढत गेल्याने खडकवासला नाक्याजवळ दोन किलोमीटर दूरपर्यंत वाहनांची रांग लागली होती. अतिरिक्त मनुष्यबळ मागावून आम्ही गर्दी नियंत्रित केली. पुढील वीकेंडला आम्ही सकाळपासूनच अधिक मनुष्यबळ उपलब्ध करणार आहोत.

– सदाशिव शेलार, पोलिस निरीक्षक, हवेली

बंदी असतानाही पर्यटक वेगवेगळ्या मार्गांनी लोणावळ्यात येत आहेत. या वीकेंडला आम्ही ४३९ पर्यटकांवर कारवाई केली. यात दोन लाख ६२ हजार रुपये दंड जमा झाला. पुढच्या शनिवारी आणि रविवारी आम्ही रायगड पोलिसांशी बोलून खालापूरकडून येणाऱ्या रस्त्यावर बंदोबस्त लावणार आहोत. त्यामुळे त्या मार्गाने लोणावळ्यात येणाऱ्यांवर नियंत्रण ठेवता येईल.

– तय्यब मुजावर, पोलिस निरीक्षक, लोणावळा ग्रामीण