जिंकलंस मित्रा! सुनील पाल यांनी राखलं परिस्थितीचं भान, VIDEO होतोय प्रचंड व्हायरल
सिनेमा

जिंकलंस मित्रा! सुनील पाल यांनी राखलं परिस्थितीचं भान, VIDEO होतोय प्रचंड व्हायरल

आपल्या विनोदांनी प्रेक्षकांना खळाळून हसविणारे प्रसिद्ध अभिनेते आणि स्टँडअप कॉमेडियन सत्यप्रकाश उर्फ राजू श्रीवास्तव (वय ५८) यांचे बुधवारी सकाळी दिल्ली इथं निधन झालं. १० ऑगस्ट रोजी हृदयविकाराचा झटका आल्यानं त्यांना रुग्णालयात दाखल करण्यात आलं होतं. त्यानंतर गेले ४१ दिवस राजू त्यांच्यावर उपचार सुरू होते.

अँजिओप्लास्टीनंतर त्यांना व्हेंटिलेटरवर ठेवण्यात आलं होतं. त्यांच्यामागं पत्नी शिखा, मुलगा आयुष्मान आणि कन्या अंतरा श्रीवास्तव असा परिवार आहे. राजू यांच्या निधनानं विनोदाचा तारा निखळल्याची भावना मनोरंजनसृष्टीतून व्यक्त होत आहे.

‘चाळीस दिवसांनंतर आजाराशी असणारी त्यांची झुंज अपयशी ठरली,’ अशी प्रतिक्रिया राजू यांचे बंधू दीपू श्रीवास्तव यांनी दिली. राजू श्रीवास्तव यांच्या अंत्ययात्रेला सेलिब्रिटी आणि चाहत्यांनी गर्दी केली होती. पण अशा दु:खद प्रसंगातही काही चाहत्यांना भान राहत नाही. सेलिब्रिटीही माणसंच असतात हे ते विसरतात. जवळच्या व्यक्तीला गमवल्याचं दु:ख त्यांनाही असतं. पण चाहते तिथं आलेल्या इतर सेलिब्रिटींसोबत फोटो, सेल्फी काढण्याचा प्रयत्न करत असतात. अशा प्रसंगाला सुनील पाल सामोरे गेले.

सुनील पाल हे राजू श्रीवास्तव यांचे खास मित्र, दोघांनी एकत्र करिअर सुरू केलं. जवळचा मित्र गमवल्याच्या भावना त्यांनी व्यक्त केल्या. मित्राच्या अंत्यविधींसाठी सुनील पाल आले होते. अंत्ययात्रेत सहभागी असताना एक व्यक्ती सुनील पाल यांच्यासोबत सेल्फी काढण्याचा हट्ट करताना दिसून आला. हा प्रसंग फोटो काढण्याचा नाही, आता फोटो काढता येणार नाही, असं सुनील पाल यांनी त्या व्यक्तीला सांगून समजवण्याचा प्रयत्नही केला.

हा व्हिडिओ सध्या सोशल मीडियावर व्हायरल होतोय. हा फोटो पाहून नेटकऱ्यांनी या व्हिडिओतील व्यक्तीला चांगलंच सुनावलं आहे. चाहत्यांना देखील वेळ आणि काळ याचं भान असायला हवं, असं त्यांनी म्हटलं आहे. तसंच चाहते आणि नेटकऱ्यांनी सुनील पाल यांचं कौतुक केलं आहे.

राजू यांचा प्रवास

राजू यांचा मनोरंजनसृष्टीतला प्रवास ऐंशीच्या दशकातच सुरू झाला. ‘मैनें प्यार किया’, ‘बाजीगर’ या चित्रपटांतही त्यांनी काम केले. २००५ मध्ये आलेल्या ‘द ग्रेट इंडियन लाफ्टर चॅलेंज’ या कार्यक्रमाने त्यांना घराघरांत लोकप्रियता मिळवून दिली. विनोद क्षेत्रातला सद्गृहस्थ अशीही त्यांची ओळख होती. राजू यांनी २०१४ मध्ये समाजवादी पक्षातून राजकारणात प्रवेश केला. त्यांना कानपूरमधून लोकसभेची उमेदवारीही मिळाली होती. त्यानंतर काही दिवसांनी त्यांनी भारतीय जनता पक्षात प्रवेश केला होता. श्रीवास्तव हे उत्तर प्रदेशच्या फिल्म डेव्हलपमेंट कौन्सिलचे सदस्यही होते.