गर्भातील बाळाला कधी आणि कशी जाणवते पदार्थाची चव, गाजर खाल्यावर असं होतं तोंड,अभ्यासात मोठा खुलासा
लाइफस्टाइल

गर्भातील बाळाला कधी आणि कशी जाणवते पदार्थाची चव, गाजर खाल्यावर असं होतं तोंड,अभ्यासात मोठा खुलासा

गर्भवती स्त्रिला गरोदरपणात कायमच उत्तम, ताजं आणि चांगला आहार घेण्याचा सल्ला दिला जातो. गर्भवती स्त्रिचा आहाराचा थेट परिणाम बाळाच्या आरोग्यावर होतो. पण आता संशोधनात असे आढळले आहे की, गर्भवती स्त्रीच्या विशिष्ट आहारातून बाळाच्या चेहऱ्यावर हसू आणि रडू आढळून आलं आहे. संशोधनात डॉक्टरांनी 100 गर्भवती स्त्रियांचे 4D अल्ट्रासाऊंड स्कॅन केले. यामध्ये जे स्पष्ट झालं ते थक्क करणारं होतं.

मुलांना अगदी जन्मापूर्वीच तुम्ही उत्तम आहाराची सवय लावण्यास तुम्हाला मदत होऊ शकते. किंवा गर्भवती स्त्रीच्या मानसिकतेचा देखील गर्भावर कसा परिणाम होतो, हे देखील या संशोधनातून समोर आले आहे. त्यामुळे गर्भवती स्त्रीने नऊ महिन्यांच्या गरोदरपणात काय काळजी घ्यावी, हे समजून घेणं आवश्यक आहे. (फोटो सौजन्या – टाइम्स ऑफ इंडिया)

गाजर चेहऱ्यावर हसू आणतं तर पालेभाज्या बाळांना रडवतात
गर्भधारणेत तुम्ही जे खाता त्याचा बाळाच्या आरोग्यावर परिणाम होतो. पण आता असे संशोधनात आढळून आले आहे की, बाळाच्या चेहऱ्यावरील हावभाव देखील बदलतात. गर्भवती स्त्रियांच्या 4D अल्ट्रासाऊंड स्कॅनमध्ये त्यांची मुलं गाजर आणि हिरव्या पालेभाज्या यांना वेगळ्या पद्धतीने कशी प्रतिक्रिया देतात हे आढळून येईल.

संशोधनात असे दिसले की, गर्भाने गाजर खाल्ल तर चेहऱ्यावर हसू आलं आणि पालेभाज्यांनी चेहऱ्यावर रडू आलं. संशोधकांचा असा विश्वास आहे की गरोदर स्त्रिया त्यांच्या मुलांच्या चवच्या आवडीनिवडींवर प्रभाव टाकू शकतात. मुलाच्या जन्मापूर्वीच निरोगी खाण्याच्या सवयी तयार करण्यात यशस्वी होऊ शकतात.

काय आहे अभ्यासात
या अभ्यासासाठी, 18 ते 40 वयोगटातील 100 गर्भवती महिलांचे 32 आणि 36 आठवड्यांच्या गर्भधारणेनंतर स्कॅन करण्यात आले. त्यांना सुमारे 400mg गाजर किंवा हिरव्या पालेभाज्यां कॅप्सूल देण्यात आले. जे त्यांनी स्कॅनच्या सुमारे 20 मिनिटे आधी खाल्ले. गर्भवती महिलांनी गाजर आणि पालेभाज्या फ्लेवरच्या कॅप्सूल घेतल्यानंतर लगेचच तज्ञांनी गर्भाच्या प्रतिक्रिया नोंदवल्या. न जन्मलेल्या बालकांच्या चेहऱ्यावरील प्रतिक्रिया नोंदविल्या गेल्या.

बाळाला कशी कळते चव
लोक चव आणि गंध या दोन्हींच्या मिश्रणातून चव अनुभवतात. भ्रूणांच्या बाबतीत, गर्भातील अम्नीओटिक द्रवपदार्थ श्वासाद्वारे आणि गिळण्याद्वारे स्वाद ओळखतात. “आताच झालेल्या अभ्यासामुळे त्यांच्या मातांनी खाल्लेल्या अन्नातील विविध स्वाद आणि वास जाणून घेण्याच्या गर्भातील बाळ प्रयत्न करते. तसेच त्यांच्यातील फरक देखील भ्रूण ओळखत असल्यामुळे याचा पुढच्या संशोधनासाठी मदत होईल,असे अभ्यासाच्या सह-लेखिका प्रोफेसर नड्जा रीसलँड यांनी सांगितले.

गर्भातूनच लावा निरोगी आहाराची सवय
या संशोधनाचे नेतृत्व करणाऱ्या पोस्ट ग्रॅज्युएट बेझा उस्तून म्हणाल्या, “जन्मापूर्वीच्या गर्भातील बाळाच्या प्रतिक्रिया पाहणारा हा पहिला अभ्यास आहे. आम्हाला वाटते की जन्मापूर्वी फ्लेवर्स कळू लागल्यामुळे जन्मानंतर त्यांची खाण्याची आवड त्या पद्धतीने होते. तसेच निरोगी खाण्याच्या उद्देशाने तुम्ही या गोष्टींचा विचार करू शकता.

हे निष्कर्ष मानवांमध्ये चव आणि गंध रिसेप्टर्स कसे विकसित होतात यावरील पुढील संशोधनात मदत करू शकतात. गरोदरपणात आई काय खातात याचा परिणाम बाळाच्या जन्मानंतरच्या आवडीवर होऊ शकतो. त्यामुळे तुम्ही त्यांच्या जन्माआधीच फळे आणि भाज्यांची आवड वाढवू शकता. तसेच बाळाला जन्माच्या अगोदरपासूनच तुम्ही सुदृढ आहार देऊ शकता.

गरोदर स्त्रीच्या तणावाचा बाळावर होतो परिणाम
अभ्यासाच्या सह-लेखिका प्रोफेसर नड्जा रीसलँड यांनी सांगितले की, त्यांच्या प्रयोगशाळेत 4D अल्ट्रासाऊंड स्कॅनद्वारे केलेल्या संशोधनात आणखी काही गोष्टी नमूद झाल्या आहेत. जसे की, धूम्रपान करणाऱ्या गर्भवती स्त्रीया. तसेच तणाव, नैराश्य आणि चिंता यामधून जाणाऱ्या गर्भवती स्त्रियांचा गर्भातील बाळावर परिणाम होतो. मातेच्या वर्तणुकीचा देखील गर्भावर परिणाम होतो आणि ते गर्भ तशी प्रतिक्रिया देखील देतं. धक्कादायक बाब म्हणजे गर्भधारणेदरम्यान धूम्रपानाच्या संपर्कात असलेल्या लहान मुलांमध्ये संभाषण क्षमतेमध्ये मोठा परिणाम होतो.

पुढील संशोधनात ही गोष्ट होईल अधोरेखित
ऍस्टन युनिव्हर्सिटी, बर्मिंगहॅमचे संशोधन सह-लेखक प्रोफेसर जॅकी ब्लिसेट म्हणाले की, “गर्भ कालांतराने या फ्लेवर्सना कशी प्रतिक्रिया देतं हे पाहणे त्यांच्या पुढील संशोधनात आहे. यामुळे संशोधकांना हे निश्चितपणे निष्कर्ष काढता येईल की माता गर्भाच्या चवीवर प्रभाव टाकू शकतात का? जेणे करून बाळाच्या जन्मानंतर त्याची चव ठरू शकते.